Wer richtich levv, der wierd jesond
| Et jeit doch hock von Mont zo Mont, wer richtich lew, der wierd jesond. Weil mir ons dovon jet erwade, sen mir jetz jeden Daach em Jade, met Hau on Stechschöpp, Kaasch on Räche, semmir am Haue, Kölsche, Stäche, et wierd bei ons von froh bes spät, jehack, jekrogg, jeplanz, jesät.Doch Krobes, Schlentejras on Wenn, die kreien ons noch flocke en. Brönessele on Ketteschobbe stöhn op de Speisekaat janz owwe, doch wemme och et Onkrout esse, et wieß dofür nur ömsu besse. Wer mäht sech at deswäje jeck, jed Onkrout hat och senge Zweck.De Satz von Kaffee öde Tee, on och de Reste vom Büfee, Jemösaffall on Jrompereschale, wierd alles für Kompoß behale. Och Appel-, Quitte-, Berreketsche, de Stein von Kiersche, Prumme, Kwötsche, die sorjen, dat et richtich wieß, en ohsem Öko-Paradies. | Me han Spinat, Schaffur on Ölech, ohs Schloteköpp sen net zemölesch. Dat och die Äeze ons jet brenge, bespreideme se met Jadenge. Ohs Jürkche sen schön fresch on knackisch, nur ohse Kappes wieß jet rackisch. Met Hoanspöhn, Torf, Kompoß on Meß, wierd et noch schöne wie et es.Me han de Wildnis vür de Dur, de Vüjel sengen ons jet vür. Do es für alles en Oase, on doräm han mir keine Rase. De Schnääke weren joot jefödet, on jeden Daach met Bier jeködet, do sen well Kneng, en Katz on Möüs, on och de Ruhse sen voll Löüs.Met Schrönn on Blose en de Hand, de Arme rud vom Sonnebrand, schaff menge Mann och jäen on wellech, der kret nur noch de Pittezillech, wenn ech ens en de Bunne sen. Esu jeit dat nou, daachous, daachen, et Kreuz kapott, de Flosse wond, wer richtich lew, der wierd jesond.Marianne Slater |